උදෑසන සන්සුන් වුවත් අවට තත්ත්වය ගැටළුකාරීවී තිබිණි. අවට පැතිරී තිබූ ගන මීදුම කෲසෝ ඇතුළු යාත්‍රාවේ සිටි පිරිසගේ යාත්‍රා මඟ අවහිර කොට තිබුණේය.
අද එතැන් සිට...........
රොබින්සන් කෲසෝ - පස්වැනි කොටස
අපි අපේ සියලු ශ්‍රමය යොදා යාත්‍රාව පැද ගියෙමු. දිවා කාලය ගෙවී ගොස් සවස් කාලය උදාවූ බව අපට තේරුම් ගත හැකි විය. සවසත් ගෙවී ගොස් රාත්‍රී අඳුර අවට පැතිර ගියේය. එහෙත් අප යාත්‍රා කරන්නේ කොයි දෙසකටදැයි නොදැන අපි ඔහේ අරමුණකින් තොරව යාත්‍රා කරමින් සිටියෙමු.
රාත්‍රිය ගෙවී ගොස් හිරු උදාවී ආවේය. එයින් අදහස් වන්නේ අප ඊළඟ දිනය වන විටත් සයුරේ අතරමංවී සිටින බවයි.
දවසේ උදාවත් සමග තමා අපට තේරුම් ගියේ අප මේ යාත්‍රා කරමින් සිටින්නේ වෙරළ දිශාවට නොව ගැඹුරු මුහුද දෙසට බවයි.
අප ඒ වන විට වෙරළෙන් ඈත්වී ලීග දෙකක දුරක්වත් ගැඹුරු මුහුද දෙසට යාත්‍රා කරමින් ඉන්නට ඇතැයි මට සිතිනි.
ගන මීදුම පහවී ගොස් හොඳින් හිරු එළිය පැතිරෙන්නට විය. දීප්තිමත් වෙමින් තිබූ උදෑසනත් සමග අපි අලුත් බලාපොරොත්තුවක්ද සමගින් යාත්‍රාව වෙරළ දෙසට පදිින්නට පටන් ගතිමු. එහෙත් ඇත්තටම අප සිටියේ දැඩි අපහසුවෙනි. තදින්ම දැනුණු කුසගින්න යාත්‍රාවේ සිටි හැම දෙනාම දැඩිව පෙළුවේය.
ගොඩබිමට පැමිණි පසු අපේ ස්වාමියා අපට කීවේ අප මුහුණු දුන් අහඹු සිදුවීම වැනි සිදුවීම්වලට මුහුණ දීමට අනාගතයේදී වඩාත් හොඳ වාතාවරණයක් සකස් කොට ගත යුතු බවයි. ඔහු අපට තව දුරටත් දන්වා සිටියේ මින්මතු මසුන් අල්ලන්නට යන ගමනට අනිවාර්යයෙන්ම මාළිමාවක් මෙන්ම ආහාරපානද රැගෙන යා යුතු බවයි.
අපට යම් අවවාද දුන්සේම ඔහු යම් පියවර ගන්නටද උනන්දු විය. ඔහු වඩුවකුට උපදෙස් දුන්නේ දිගු බෝට්ටුවේ මැදට වෙන්නට කුඩා කාමරයක් වැනි කොටසක් ඉදි කළ යුතු බවයි. එසේම ඒ ඇතුළත සෑහෙන ඉඩ ප්‍රමාණයක්ද තැබිය යුතුයැයි ඔහු තව දුරටත් දන්වා සිටියේය. එයින් ඔහු අදහස් කළේ අවශ්‍ය වෙලාවට ඒ කාමරය තුළ ඔහුට දිගාවී සිටින්නට ඇවැසි බවයි. එසේම සේවකයන් දෙදෙනකුට එහි ඉඩපහසුකම් තිබිය යුතු විය. කෑම ගැනීම සඳහා මේසයක්ද, ආහාරපාන අසුරා තැබිය හැකිසේ ලොකර කිහිපයක්ද ඒ කාමරයට අඩංගු කළ යුතු විය.
නව අංග ඇතුළත් කළ බෝට්ටුව පැද ගෙන අපි නිතර මසුන් ඇල්ලීම සඳහා මුහුදේ යාත්‍රා කළෙමු. මා මසුන් ඇල්ලීමෙහි සමතකු බව මම මේ වන විට මගේ ස්වාමියාට ඔප්පු කොට ඇත්තෙමි. ඒ නිසාමදෝ ස්වාමියා මා නැතිව මසුන් ඇල්ලීම සඳහා මුහුදේ යාත්‍රා කළේ නැත.
එක් දිනක් මගේ ස්වාමියා බෝට්ටුවේ චාරිකාවක් සූදානම් කළේය. එය ඇතැම් විට මසුන් ඇල්ලීම හෝ විනෝදය හෝ පිණිස යන මුහුදු චාරිකාවක් විය හැකියැයි මට සිතිනි. මේ චාරිකාවට දෙදෙනෙකු හෝ තිදෙනෙකු හෝ මුස්ලිම් ජාතිකයන්ද සහභාගී වීමට නියමිත විය. මේ චාරිකාව වෙනුවෙන් මගේ ස්වාමියා අමතර වෙහෙසක් දරමින් සූදානම් වන බව මට තේරුම් ගියේය. අමතර ආහාරපාන මෙන්ම ආයුධද මේ සූදානමට එක් කරන ලදී. ආයුධ අතර තුවක්කු තුනක්ද තිබිණි. එයින් හැඟී ගියේ මසුන් ඇල්ලීමට අමතරව පක්‍ෂීන් දඩයම් කිරීමක් සඳහාද ලකලැහැස්තියක් ඇති බවයි.
ස්වාමියා ලබා දුන් විධාන අනුව මම ගමනට සූදානම්වී සිටියෙමි. ගමනේ යෙදෙන්නට නියමිතවූ බෝට්ටුව සෝදා පිරිසිදු කළේ මාය. ගමනට සහභාගී වන අමුත්තන්ගේ අවශ්‍යතාද සියල්ල සම්පූර්ණ කොට තැබුවෙමි.
සියල්ල සූදානම් කර ගෙන සිටි මා වෙත ස්වාමියා ආවේ තනිවමය. ඔහු මට දන්වා සිටියේ සිටියේ කලින් කතාබහ කරගත් ලෙසින් චාරිකාව සඳහා අමුත්තන් නොපැමිණෙන බවයි. ඔහු මට කීවේ වෙනදා මා සමග යන දෙදෙනා සමග ගොස් සුපුරුදු ලෙස මසුන් අල්ලා ගෙන එන ලෙසයි.
ඒ දැනුම්දීමත් සමග මේ අවස්ථාව ගැන මා තුළ විශේෂයක් දැනෙන්නට විය. මේ ස්ථානයෙන් ගැළවී යාමේ අදහස මා සිත තුළ මෝදු වන්නට විය. මට සිතුනේ මා කුඩා නෞකාවක අණ දෙන්නකුගේ තත්ත්වයට පත්වී ඇති බවයි.
- කෲසෝගේ ඉදිරි පියවර කෙසේවීද? ඊළඟ කොටසින් කියවන්න.
No comments:
Post a Comment