'ඇලයාපත්තුවේ හිත හොඳ දොස්තර.'
කලකට පස්සේ දොස්තර කෙනෙකුන් ගැන හොඳ පුවතක් දැන ගත්තේ
ශාන්ත ගති ඇති ප්‍රියශාන්ත ගැන ඇලයාපත්තුව ගම පැත්තේ
කියැවෙන කතාව පොතකපතක ඇති චරිතෙක ගතිගුණ ගෙන ඇත්තේ
ඒ මුත් ඇත්තට ඇත්තම සිදුවෙයි පුදුමය අහකටවී ඇත්තේ
බීමතින් රිය පදවා මිනිසුන් යට කරන වෛද්‍යවරියන් ගැනත් හෙදියන්ගේ හිස් පලන වෛද්‍යවරු ගැනත් අසන්නට ලැබෙන මේ රටේ තමාගේ කැපවීමෙන් රෝහලක් ගොඩ ගන්නට උත්සාහ කරන වෛද්‍යවරයකු ගැනද අසන්නට, කියවන්නට ලැබීම ඇත්තටම සතුටට කරුණකි.
ඔහු මේ උත්සාහ දරමින් සිටින්නේ රෝගීන් සුවපත් කරන්නට බව ඇත්තය. එහෙත් ඇත්ත වශයෙන්ම සිදු වන්නේ රෝහල වටා ඇති ගම්මානවල වසන අහිංසක මිනිසුන්ගේ ජීවිත සුවපත් කිරීමය. ඒ ගම්වැසියන්ගේ සිත් ශක්තිමත් කිරීමය. මේ වෛද්‍යවරයා සහ ඔහුගේ සහායක කණ්ඩායමත් නිසා තමන්ට නිරෝගී මනසක් හා ජිවිතයක් ලැබෙන බව ගම්වාසීන්ට දැන් සහතිකයක් ඇත. ඒ නිසා ඒ ගැන සිතීම පවා ඔවුනට ජීවිතයට සහනයක් ලැබීමකි.
ඒ හා මතුව එන තවත් කතාකළ යුතු පැත්තක් ඇත. ඒ පැත්තේ ඉන්නේ වෛද්‍යවරයාට තම උසස් අරමුණු සඳහා යන්නට දිරි දෙන බාහිර පාර්ශවයන්ය.
පන්සල්වල ස්වාමීන් වහන්සේලා, ආරක්‍ෂක අංශවල නිලධාරීන් අනෙක් වෛද්‍යවරු, රෝහල් කාර්ය මණ්ඩලය සහ ගම්වාසීන් ඒ පාර්ශවයේ සිටිති. කෙනෙක් යමක් උසස් අරමුණකින් සිදු කිරීමේදී ඊට අකුල් හෙලන සහ ඒ කටයුත්තේ යෙදී සිටින අයගේ කකුලෙන් අදින මිනිසුන් වැඩියෙන් සිටින සමාජයක මෙවැනි යහපත් මිනිසුන්ද සිටින බව සිහි කිරීමත් සතුටකි.
ඒ අරමුණු සියල්ල සැලැසුම් කරන ආකාරයෙන්ම ඉටු කර ගන්නට ශක්තිය ධෛර්යය ලැබේවා යන්න අපේ පැතුමයි.
No comments:
Post a Comment