මිලියන ගණනක වංචාවට දඬුවමක්.
මිලියන ගණනක වංචාවක් ගැන කැළණිය පැත්තෙන් රැව් දෙන්නේ
ජලයට පෙම් බැඳි මණ්ඩලයක සිට වංචාවකටයි බර වෙන්නේ
මුදල් සොයන්නට ඉක්මන්වූ ඔහු රැකියාවත් පාවා දෙන්නේ
නීතිය ඉස්මතුවී ඇත්තේ එහි ඔහු හට දඬුවම් හිමි වන්නේ
ජාතික මණ්ඩලයක ගණකාධිකාරිවරයකු චෙක්පත් අව භාවිතයෙන් රුපියල් මිලියන දොළහක මුදල් වංචා කොට ඇති බව වාර්තා වේ. ඒ වංචාවත්, ඔහුගේ වංචා සහගත බවත් තහවුරු වීම නිසා මහාධිකරණයෙන් ඔහුට ලැබී ඇත්තේ දැඩි තීන්දුවකි.
විත්තිකරුට මූලික වශයෙන් ලබා දී ඇති දඬුවම වසර තිස්හතක සිර දඬුවමකි. එයද බරපතළ වැඩ ඇතිවය.
ඔහුට නියම කොට ඇති දඩ මුදල රුපියල් ලක්‍ෂ හතළිහකි. රුපියල් ලක්‍ෂ එකසිය තිහක වන්දියක්ද ඔහු විසින් අදාළ ජාතික මණ්ඩලයට ගෙවිය යුතුය. එම දඩ සහ වන්දි මුදල් ගෙවීමට අසමත් වන්නේ නම් වසර විසිතුනක බරපතළ වැඩ ඇතිව අමතර සිර දඬවමක්ද නියම කොට ඇත්තේය.
මේ විත්තිකරු මෙවැනි වංචා සහගත කටයුතු කෙරෙහි ආධුනිකයකු නොවන බවද හෙළිවී ඇත. හොර අත්සන් යෙදීම, සිය අත්අකුරුම යොදා ගෙන චෙක්පත් සකසා ගැනීම වැනි ව්‍යාජ දේ සඳහා ඔහුට හොඳ හුරුවක් ඇති බව පෙනේ. මෙවැනි වංචාවකට මැදිවී කටයුතු කළ කෙනෙකුට ලබාදී අධිකරණ විනිශ්චය යුක්ති සහගතයැයි විශ්වාස කළ හැකිය.
ප්‍රශ්නය ඇත්තේ අධිකරණයේවත් නඩු තීන්දුවේවත් නොවේ. ප්‍රශ්නය ඇත්තේ රටේ සිදුවී ඇති අනෙක් සුප්‍රසිද්ධ හොරාකෑම් ගැන නඩු ඉදිරිපත් නොවීම බව පෙනේ. නඩු පැවරීමට අදාළ පුද්ගලයන් සහ සනාථ කළ හැකි සාක්‍ෂි අවශ්‍යය. මේ කිසිවක් නිසි ලෙස සම්පාදනය නොවීම හේතුවෙන් දැනටත් රටවැසියන් හොඳින් දන්නා හඳුනන බොහෝ සොරකම් වෙනුවෙන් නඩු පැවරී නැති බව පෙනේ.
ඊට හේතුව වී ඇත්තේ කවර ආකාරයක කරුණක් හෝ කරුණු හෝද යන්න පැහැදිලි නැත. කෙසේ හෝ මිලියන ගණනින් නොව බිලියන ගණන්වලින් සොරකම් සිදුවී ඇතැයි නොදන්නේ ඊයේ රැයේ ඉපැදුණු බිළිඳුන් පමණක් විය හැකිය. එහෙත් ඒ අය වෙනුවෙන් අධිකරණයකට දඬුවම් දෙන්නට තරම් නිසි වාතාවරණයක් තවමත් රට තුළ සකස්වී නැත. සකස් වන බවක්ද පෙනෙන්නට නැත.
No comments:
Post a Comment