දිරි ඇති මණ්ඩුක

මණ්ඩුක කියන්නේ මැඩියාට. මැඩියා කියන්නේ ගෙම්බාට බව දරුවන් දන්නවා නේ? 

අප අද ඔබට ඉදිරිපත් කරන කතාවට පසුබිම් වෙන්නේ මැඩියන් පිරිසක්.

මැඩියන් - මණ්ඩුකයන් පිරිසක් දවසක් කැලෑවක් මැදින් ගමනක් ගියා.

ඒ ගමන අතරතුර දී පිරිසේ සිටි මණ්ඩුකයන් දෙදෙනකු වනයේ ඇති වළකට වැටුණේ අහම්බෙන්.

අනෙක් මණ්ඩුකයන් සියලු දෙනා ම වළ වටා රොක් වුණා. ඔවුන් විමසිලිමත් වූයේ තම මිතුරන් දෙදෙනා වැටුණු වළේ ගැඹුර දැන ගැනීමටයි. 

ඒ වළ ඉතා ම ගැඹුරුයි.

ඔවුන් වළේ වැටී ඉන්නා තම මිතුරන්ට දැනුම් දුන්නේ වළේ ඇති ගැඹුරේ තරමයි. ඒ දෙදෙනාට ම මේ ගැඹුරු වළෙන් පිටතට ඒමට කිසිදු ආකාරයක පුළුවන්කමක් තිබිය නොහැකි බවත් ඔවුන් සිය අවාසනාවන්ත මිතුරන්ට දැනුම් දුන්නා.

තම මිතුරන්ගේ දැනුම් දීම සහ බලාපොරොත්තු රහිත වීම වළේ උන් මණ්ඩුකයන් නොසලකා හැරියා. ඔවුන් දෙදෙනා කල්පනා කරන්නට පටන් ගත්තේ තමන්ට මේ ගැඹුරු වළෙන් ගොඩ යා හැකි ක්‍රමයක් ගැනයි. තමන්ට එසේ කළ හැකියැයි දෙදෙනා ම සිතා ගත්තා. වළෙන් ගොඩ ඒම සඳහා දෙදෙනා උත්සාහ කරන්නට පටන් ගත්තා.

 ඔවුන් දෙදෙනා ම වළේ බිත්තිය අල්ලමින් උඩට පනිමින් වළෙන් ගොඩට පැමිණීමේ උත්සාහය පටන් ගත්තා. 

ඔවුන්ගේ උත්සාහය දකිමින් වුවත් වළේ විවරය වටා සිටි මණ්ඩුක පිරිස දිගින් දිගට ම කෑ ගසමින් කියා හිටියේ ඉහළට පනිමින් වළෙන් ගොඩට එන්නට දරන උත්සාහය ඵලවත් නොවන බවයි.

වළ තුළින් ගොඩට එන්නට එන්නට උත්සාහ දරමින් සිටි එක මණ්ඩුකයකු තම මිතුරු පිරිස කෑ ගසමින් කියන අවවාදය පිළිගත්තාක් වැනි වුණා. ඔහු තම උත්සාහය අත හැරියා. වළ පතුලට ඇද වැටුණු මණ්ඩුකයා මිය ගියා.

අනෙක් මණ්ඩුකයා තම උත්සාහය අත හැරියේ නැහැ. තමන්ට හැකි පමණින් වෙර දරමින් වළේ විවරය වෙත ළඟා වන්නට ඔහු තමන්ට හැකි ලෙසින් උත්සාහ කළා. 

වළේ විවරය වටා රැඳී සිටින මැඩි පිරිස ඔහුට කෑ ගසමින් කියන්නට වුණේ ඒ වේදනාකාරී උත්සාහය අත් හැර දමන ලෙසයි. ඔවුන් වැඩි දුරටත් කීවේ මරණය ඊට වඩා සැපවත් විය හැකි බවයි.

ඒ කුමක් වූවත් වළේ දැනට ඉතිරිව ඉන්නා මැඩියා තම මිතුරන්ගේ යෝජනා අවවාද පිළිගත් බවක් පෙණුනේ නැහැ. 

දිගට ම දැඩි උත්සාහයක යෙදුණු මැඩියා ඒ උත්සාහයේ ප්‍රතිඵලය ලබා ගත්තා. වළේ විවරයෙන් ගොඩට පැන ගත්තා.

ඒ විගස ම මැඩි මිතුරු කැළ ඔහු වට කර ගත්තා.

“ඔබට ඇහුනේ නැති ද අප කී දේ? ඇයි ඔය තරම් දැඩි උත්සාහයක් ගත්තේ?”

ඒ ප්‍රශ්නයට ගොඩට ආ මැඩියා දුන්නේ අපූරු පිළිතුරක්.

“ඔය අය එහෙම දෙයක් කීව ද? මට ඒ කිසිවක් ම ඇහුනේ නැහැනේ. මට එහෙම ඇහෙන්න විදිහකුත් නෑ. මම බිහිරියි. මම හිතුවෙ ම වළෙන් ගොඩ එන්න මාව දිගට ම දිරිමත් කළා කියලයි.” 

පසු සටහන : මිනිසුන් භාවිත කරන වදන් තව අයෙකුගේ ජීවිතයට දැඩි ලෙස බලපෑම් ඇති කළ හැකි බව තේරුම් ගැනීම වැදගත්.

ඒ නිසා ම ඔබ යමක් කතා කිරීමට පෙර - ඔබේ මුවින් වදන් පිට වීමට පෙර ඒ ගැන හොඳින් සිතන්න. 

හේතුව ඔබේ වදන් තවත් කෙනෙකුගේ ජීවත් වීමට මෙන් ම ඇතැම් විට මරණයට ද පවා හේතු විය හැකි නිසයි.