2022 ගෙවී හමාර වී 2023 දැන් උදා වෙලා. වත්මන් ලෝක සම්මතය අනුව හැම වසරක ම දෙසැම්බර් මාසයේ තිස්එක්වැනි දා වර්ෂයක් අවසන් වෙනවා. ඊළඟ වර්ෂය ජනවාරි පළමුවැනිදායින් ඇරඹෙනවා. වසරේ පළමු මාසය ජනවාරි ලෙසින් හඳුන්වන්නේ ග්‍රීක දේව සාහිත්‍යයේ එන ජානුස් නම් දෙවියාගේ නම ඇසුරු කොට ගෙනයි. ජානුස් දෙවිඳුන්ට මුහුණු දෙකක් ඇති බවත් ඒ මුහුණු දෙකෙන් එක වර දෙපැත්තක් බැලිය හැකි බවත් ග්‍රීක දේව සාහිත්‍යයේ සඳහන්.
2022 අපේ රටටත් පොදුවේ ලෝකයටත් එතරම් ම සුබදායී නොවූ බවක් පැහැදිලියි. 2022 පෙබරවාරියේ පටන් රුසියාව කළ යුක්‍රේන ආක්‍රමණය තවමත් අවසන් වී නැහැ. යුද්ධය තව දුරටත් පවතිනවා. කුමන හේතුවක් නිසා ඇති වූවත් යුද්ධයක් කිසිසේත් ම ජනතාවට සුබදායී දෙයක් වන්නේ නැහැ. සැම විට ම ගෙන එන්නේ අයහපත් බවක් පමණයි.
2020 පටන් අපට අත් දකින්නට ලැබුණු කොරෝනා රෝගය තවමත් ලෝකයෙන් සම්පූර්ණයෙන් තුරන් වී නැහැ. මුලින් ම කොරෝනා ගැන අසන්නට ලැබුණු චීනයේ 2022 වසර පුරා ම රෝග වසංගතය ගැන අසන්නට ලැබුණා. චීන නායකත්වය දැඩි නීති රීති පනවමින් මිනිසුන් මිලියන ගණන් නිවෙස්වලට කොටු කර තබා ගත්තා. ඒත් පසුව ඒ තත්ත්වයට එරෙහිව ජන මතය ගොඩ නැගුනා. චීන නායකත්වයට තමන්ගේ දැඩි නීති හකුළා ගන්නට සිදු වුණේ ජන මතයට හිස නමමින්.
මීට අමතරව ලෝකය පුරා විවිධ රටවල වෙඩි තැබීම්, ජීවිත විනාශ කිරීම්, ස්වාභාවික විපත්වලට අමතරව පාළම් කඩා වැටීම් ආදියත් අසන්නට ලැබුණා.
බි්‍රතාන්‍යයේ දෙවැනි එළිසබත් මහ රැජිණගේ අභාවය අසන්නට ලැබුණේත් 2022 වසරේයි. රජ පුටුව නිත්‍යානුකූලව පිරවුනත් රැජිණගේ අභාවයත් සමග බි්‍රතාන්‍ය රාජ්‍යත්වය පිළිබඳ ලෝකය පුරා යම් අප්‍රසන්නතාවක් ඇති වූ බවක් පැහැදිලිව දකින්නට තිබුණා.
බ්රිතාන්‍ය නීතියට පිටු පා කටයුතු කළ බොරිස් ජොන්සන්ට අගමැති තනතුරෙන් ඉවත් වන්නට සිදු වූයෙත් 2022 දී යි. ඉන්පසුව වැඩි කැමැත්තෙන් අගමැති පුටුව හිමි වුණේ ලිස් ට්‍රෑස්ටයි. ඒ වුනත් ඇය ඉදිරියට ගෙනි යන්නට උත්සාහ කළ ආර්ථික ප්‍රතිපත්ති ප්‍රතික්‍ෂෙප වන්නට වූ නිසා මාස හයක් වූ ඇගේ අගමැති තනතුරෙන් ඇයට සමු ගන්නට සිදු වූණා. ඉන්දීය සම්භවයක් ඇති රිශි සුනාක් බ්රිතාන්‍ය අගමැති වූයෙත් 2022 දී මයි.
අමෙරිකාවේ හිටපු ජනපති ඩොනල්ඞ් ට්‍රම්ප්ට විරුද්ධව අධිකරණ තීන්දු තීරණ ලැබුණේත් 2022 වසරේ දී යි. වසර අවසාන වන්නට ඔන්න මෙන්න තිබියදී නිකුත් කළ ඔහු හා ඔහුගේ සමාගම්වලට අදාළ බදු වාර්තාවලින් කියැවුණේ ඔහු ඇතැම් වසරවල බදු ගෙවීම් පැහැර ඇති බවයි.
2022 අපේ රටේ මෙන් ම ලෝකයෙත් ප්‍රසිද්ධ චරිත කිහිපයක් ම ජීවිතයෙන් සමුගත් වසරක් වුණා. “පාපන්දු රජ” ලෙස ලෝකයේ ම ආදරය දිනා සිටි පේලේ ජීවිතයෙන් සමු ගත්තේ වසර අවසානයට ළං වෙද්දීයි.
අපේ රටේ රංග ශිල්පීන් ගායකයින් ආදී බොහෝ ප්‍රියතම චරිත තම ජීවිතවලින් සමු ගත්තේ 2022 දීයි. ප්‍රවීණ රංගධර ජැක්සන් ඇන්තනී දරුණු රිය අනතුරකට මුහුණ පෑවේත් 2022 දීයි.
මේ සියල්ල හැරුණු කොට 2022 අපේ රටේ ඉතිහාසයට එකතු වන වසරක් වූවා. විශාල ජනතා කැමැත්තකින් ජනපති වූ අයෙකු ඊට වඩා විශාල ජනතා එකමුතුවකින් ජනපති පුටුවෙන් නෙරපා දැමුනේ 2022 දීයි. ඒ සඳහා පසුබිම් වූයේ නොසැලෙන ලෙසකින් දියත් වූ ජන අරගලයක්. එසේ ම ජනතා ඡන්ද විමසීමකින් තොරව ව්‍යවස්ථාවට අනුව පත් වූ ජනපතිවරයකු බිහි කළේත් 2022යි.
දීර්ඝ විදුලි කප්පාදු කිරීම්, ඉන්ධන සඳහා දිගු පෝලිම්, ගෑස් පෝලිම්, අත්‍යවශ්‍ය ආහාර ද්‍රව්‍යවල අධික මිල ගණන් වැනි වැනි ප්‍රශ්න මෙන් ම විදුලි සහ ජල බිල්පත් සඳහා අයකිරීම් වැඩි වීම බදු අයකිරීම් ඉහළ දැමීම වැනි දේ සියල්ල ම සිදු වුණේ 2022 දීයි.
මේ සියලු දුෂ්කරතාවලට රටේ ජනතාවට මුහුණ දෙන්නට සිදු වී ඇත්තේ විදේශ විනිමය පිළිබඳ ප්‍රශ්න නිසායි. රටේ ජනතාව ගනුදෙනු කරන්නේ රුපියල්වලින්. ඩොලර්වලින් ගනුදෙනු කරන්නේ රජය සහ ව්‍යාපාරිකයන්. කවුරු කොහොම කළත් ඒ ගනුදෙනු සියල්ල රජයට යටත්. ඒ අනුව විදේශ විනිමය පිළිබඳ ප්‍රශ්න සඳහා පිළිතුරු දිය යුත්තේ පවතින කවර හෝ රජයක් විසින්.
රටක පවතින හැම ආකාර ප්‍රශ්නයක් ම ඍජුව හෝ වක්‍රාකාරව හෝ රටේ දරුවන්ට බලපානවා. අපේ රටේත් එහෙමයි. ආර්ථික කඩා වැටීම් හේතුවෙන් වැඩිපුර ම දුෂ්කරතාවන්ට මුහුණ පාන්නේ අඩු ආදායම් ලාභීන්. ඒ ඇරත් ආහාරපාන, පොත්පත් මිල වැඩි වීම, වෙනත් පාසල් උපකරණ මිල වැඩිවීම් ආදිය දරු පරපුරට අහිතකර බලපෑම් ඇති කරනවා.
මේ හැමට ම ඉහළින් පවතින ප්‍රශ්නය වන්නේ දරුවන්ගේ කුසිගිනි නිවීමයි. වැඩිහිටියකු අමාරුවෙන් ඉවසා ගත්තත් දරුවකු දිගින් දිගට ම කුසගිනි උහුලන්නේ කෙසේ ද?
මේ වැනි ප්‍රශ්න බොහොමයක් අපට 2022න් උරුම වී තිබෙනවා. 2023ට අප පිවිසෙන්නේ තවමත් නිශ්චිත නොවු විසඳුම් ඇති ප්‍රශ්න රැසක් උරුම කර ගෙනයි. ඒවාට අප හැකි ලෙසින් දිරියෙන් යුතුව මුහුණ දිය යුතුයි.
සැමට ම සුබ අලුත් අවුරුද්දක් වේවා.
No comments:
Post a Comment