රාත්‍රී අඳුර අවට තදින් ම පැතිරෙමින් තිබුණා. අවට කඳු ශීර්ෂ අඳුරින් වැසී යන්නට පටන් ගත්තේ බලා සිටියදීමයි. කඳු අතර ගමන් කරමින් සිටි මිනිසා මුහුණ දුන්නේ බලාපොරොත්තු නො වූ තරමේ විශාල දුෂ්කරතාවකට. අවට කිසිවක් ම දැකගත නො වීම නිසා ඔහුට දැනුණේ බලවත් අපහසුතාවක්. මෙතෙක් අහසේ දැකගත හැකි වූ සඳ සහ තාරකා සියල්ලත් වළාකූළුවලින් වැසී ගියා.
කඳු මුදුනට ළඟා වන්නට කඳු නගින්නා තවත් යා යුතු වූයේ පියවර කිහිපයක් පමණයි. අවට වසා ගත් අඳුරේ වුවත් මිනිසා ඒ සඳහා උත්සාහ කරන්නට වුණා. ඒත් ඔහු අඳුරේ තැබූ පියවර ලිස්සා ගියා.
පියවර ලිස්සා ගිය කඳු නගින්නා අඳුරේ ම හිස් වාතයට විසි වී ගියා. අවට පැතිර ඇති අඳුර ඔහුට ඔච්චම් කරද්දී ඔහු දැඩි වේගයකින් පහළට ඇද වැටෙමින් සිටියා. ඔහු තුළ ඇති වුණේ ඉතා දරුණු බියක්. තව මොහොතකින් කුමක් වේදැයි කිසිවක් නොම දැන සිටි ඔහුව ගුරුත්වාකර්ෂණය මගින් පහළට ඇද ගනිමින් තිබුණා.
දැඩි බියකින් යුතුව මෙන් ම කරකියා ගත හැකි කිසිවක් ම නැති කඳු නගින්නා නිශ්චිත නොවූ ඇද වැටීමකට මුහුණ දී සිටියා. පහළට වැටෙන ඔහුගේ සිතේ පහළ වූයේ මෙතෙක් තමා ගෙවූ දිවියේ විවිධ අවස්ථායි. තව මොහොතකින් තමා මුහුණ දෙන මරණය කොයි ආකාරයේ වේ දැයි ඔහු දැඩි බියකින් යුතුව සිතා ගන්නට උත්සාහ කළා.
දැඩි වේගයකින් පහළට ඇදී ආ කඳු නගින්නාගේ වැටීම එක වර ම නතර වුණා. කඳු නැගීමේ දී ඉණ වටා බැඳ ගන්නා ආරක්ෂාකාරී පටියෙන් ඔහු එල්ලී සිටින්නට වුණේ එවිටයි. ගන අඳුරේ හිස් වාතයේ ඔහු එල්ලී සිටියා. ඔහු සතු එක ම පිටුවහල වූයේ ඔහුගේ බඳ වටා ඇති පටියයි. මේ ඉරියව්වෙන් කොතෙක් වෙලා කෙසේ හිඳින්න ද?
තමන්ට මෙවැනි අවස්ථාවක උදව්වට එතැයි සිතිය හැකි එක ම බලවේගය ගැන ඔහු කල්පනාවට ගත්තා.
”අනේ දෙවියනි, මට උදව් කරන්න.” ඔහු හැකි තරම් වෙර යොදා මොර දුන්නා.
ඒ මොහොතේ ම ගැඹුරු හඬක් අහස දෙසින් නැගී ආවා.
“මට ඔබ වෙනුවෙන් කළ හැකි වන්නේ කුමක් ද?” ඒ හඬ විමසුවා.
“මාව බේර ගන්න දෙවියනි.” විපතට මුහුණ දී සිටි කඳු නගින්නා ඉල්ලා සිටියා.
“ඔබ ඇත්තට ම හිතනවා ද මට ඔබව බේරා ගත හැකියි කියා?”
”ඇත්තෙන් ම ඔව්. මට විශ්වාසයි ඔබට එසේ කළ හැකියි කියා.”
“එසේ නම් ඔබ එල්ලී සිටින රැහැන කපා දමන්න.”
ඊළඟට ඇති වුණේ නිහඬතාවක්. ඒ නිහඬතාව මොහොතක් එසේ ම තිබුණා. කඳු නගින්නා තීරණය කළේ තම මුළු ශක්තිය ම යොදමින් එල්ලී සිටින රැහැනේ දිගට ම එසේ ම එල්ලී සිටීමටයි.
පසුවදාට පහන් වුණා. සහන සේවකයින් කඳු නගින්නාගේ සිරුර සොයා ගත්තා. එය දැඩි ශිතල හේතුවෙන් ගල් ගැහී තිබුණා. ඔහුගේ දෑත් ඉණ රැඳි රැහැනේ තදින් බැඳී තිබුණා.
රැහැනේ එල්ලී තිබූ කඳු නගින්නාගේ පාදවල සිට පොළොවට තිබූ දුර අඩියක් පමණයි.
(මූලාශ්‍ර ඇසුරෙන් සකස් කරන ලද්දකි.)
