උදර පිළිකාව - කියාපාන මූලික ලක්ෂණ

 

උදර පිළිකාව - කියාපාන මූලික ලක්ෂණ                                                                       

පිළිකාව කියන්නේ අසම්මත ආකාරයෙන් සිදු වන සෛල වර්ධනයක් ලෙසයි ඉතා සරලව ම හැඳින්විය හැකි වන්නේ. උදර ප්‍රදේශයේ ඇති වන පිළිකා ඉතා ම ‘දරුණු’ තත්ත්වයේ රෝග කාණ්ඩයක් ලෙසින් තමා හඳුනා ගෙන ඇත්තේ. බොහෝ විට ඉතා ම අසීරු තත්ත්වයකට පත් වන තුරු මෙම පිළිකා අවස්ථාව පිටතට නොපෙන්වීමත් එක්තරා ආකාරයක අවාසනාවන්ත තත්ත්වයක්. කෙසේ වෙතත් මෙවැනි රෝගී තත්ත්වයක මූලික රෝග ලක්ෂණ පිටතට පෙන්වන්නේ ඉතා ම අඩුවෙන්.

යුරෝපාකරයේ රටවල පිරිමි සියයකගෙන් එක් අයෙකු හෝ දෙදෙනෙකු පමණත් කාන්තාවන් සියයකගෙන් 0.5 සිට එක අයෙකු පමණත් උදර පිළිකාවලට ගොදුරු වන බව ස්ථිර කොට තිබෙනවා. 

උදර පිළිකාවේ මූලික අවධියේදී ප්‍රකට කැරෙන ලක්ෂණ රඳා පවතින්නේ උදරයේ ඇති අසාමාන්‍ය සෛල වර්ධනයේ ඇති ‘විශාලත්වය’ අනුවයි.

පහත දක්වනු ලබන රෝග ලක්ෂණ ගැන සැලකිලිමත් වීම වටී. 

1. හිස කරකැවිල්ල සහ වෙහෙස.

2. ලේ හිඟකම - මේ තත්ත්වය ඇති වන්නේ දීර්ඝ කාලීනව උදරයේ පවතින රුධිර හානි වීම් නිසා බව සැලකිය යුතුයි.

3. කළු පැහැගත් මළපහ.

4. මඳ වශයෙන් ඇති වන ආහාර අරුචිය. එසේ ම ඇතැම් ආහාර වර්ග කෙරෙහි දක්වන බලවත් අකමැත්ත.  උදාහරණ: වැඩි වශයෙන් සුවඳ ඇති කෝපි, ශාකමය කොටස් සහිත ආහාර සහ කුළුබඩු යෙදූ ආහාර.

5. ආහාර ගැනීමෙන් දිගු වෙලාවකට පසුත් ආහාර උගුරෙන් පහළට නිසි සේ නොගියා සේ දැනීම.

6. ආහාර ද්‍රව්‍ය කෙරෙහි මහත් පිළිකුළක් දැක්වීම.

7. වමනය කිරීම - ඇතැම් අවස්ථාවලදී වමනය සමග රුධිරය මඳ වශයෙන් පිටවීම.

8. වැමෑරීම සමග පළ වන ආමාශයේ දැවිල්ල.

9. උදරයේ උඩ කොටසේ හෝ පපුවේ මැද අස්ථිය ආසන්නයේ ඇති වන වේදනාව. 

10. ආහාර ගැනීමේ පිළිවෙත වෙනස් නොකර හෝ ව්‍යායාම කිරීමේ රටාව වෙනස් නොකර තිබියදී සිරුරේ ඇති වන ක්ෂණික බර අඩුවීම.

ඉහත ලැයිස්තුවේ ඇති රෝග ලක්ෂණ එකක් හෝ එකකට වැඩියෙන් හෝ ඇතත් ඔබ නිකරුණේ ඒ සඳහා බිය විය යුතු නැහැ. අමතක කරන්නට එපා. උදර පිළිකාව යනු කිසි විටෙකත් බහුල රෝගයක් නොවෙයි. අනෙක් අතට ලැයිස්තුවේ ඇති ඇතැම් රෝග ලක්ෂණ සිරුරේ ඇති වෙනත් රෝගයක් හා නෑකම් කියන්නත් පුළුවන්. 

ඒ වුනත් ඉහත ලැයිස්තුවේ ඇති රෝග ලක්ෂණ මොනවා හෝ සති ගණනාවක් ම පවතී නම් සුදුසුකම් ඇති වෛද්‍යවරයකුගේ උපදෙස් ලැබීම ඉතා ම වැදගත් මෙන් ම අත්‍යව්‍යශ දෙයක්. 

විශේෂයෙන් ම මළපහ හෝ වමනය සමග රුධිරය පිට වේ නම් වෛද්‍ය හමුව ඉතා ම කඩිනමින් කළ යුතු බවත් සැලකිය යුතුයි. ඒ, එවැනි තත්ත්වයක් කිසිසේත් ම නොසලකා නොහැරිය යුතු නිසයි.    

“නිරෝගීව සිටින්න.”